下暗"金木相合"雙星上接近 後一斗著閣等10年
買湘瑩 莊浚佑/臺北報導
發布時間：
更新時間：
目次
下昏暗天氣穩定，民眾若攑頭向西爿看，會當看著兩粒真光的星，就是金星佮木星。臺北市立天文館表示，今仔日就是𪜶上倚近的時陣，若無看著，後回閣愛等10年。(這條新聞標題、前言是臺語文。)
這幾工暗時天氣若好，會當看著西爿的天頂有兩粒真光的星，而且一工一工愈來愈倚。臺北市立天文館表示，彼就是金星佮木星，上倚的時陣，就敢若徛佇月娘的兩爿遐爾近。
臺北市立天文館研究助理趙瑞青講:「上光的彼粒是金星，仰角較懸的彼粒是木星，兩粒星的距離大概是0.5視度，下昏暗上接近的時陣，𪜶會牢佇月娘兩爿，𪜶的視角夾角，就親像中央夾一粒月娘仝款。」
欲分辨佗一粒是金星，天文館講上光的彼粒就是。金星會對下跤peh起來，然後佮木星相閃身、才慢慢離開，這款的天文景致十冬才出現一擺，下昏暗是兩粒星上接近的時陣，若無看著，後一回閣再出現的時，就是2032年的2月初7矣。
臺北市立天文館研究助理趙瑞青講:「日頭落山了後，你看對西爿的天頂，真簡單就會當看著這兩粒星，上好是下昏暗七點到七點半進前看，因為閣來𪜶就慢慢接近塗跤，就算猶未沉落 嘛會予建築物，抑是山閘著。」
毋過，受著境外汙染物的影響，環保署講今仔日空氣品質無啥好，提醒民眾若佇戶外，愛做好防範。
張曼亭/編輯
