辜寬敏一生推動臺灣獨立建國 拚制定本土憲法

白色的頭毛、白色的西裝，配一副簡單的目鏡，講話雅氣，這是臺獨志士辜寬敏予人上深的印象。1926年出世佇彰化鹿港的伊，本底只是一个佇日本讀冊、做生理的普通人，

自從1964年彭明敏因為發表臺灣自救宣言予掠去了後，彼當陣30外歲的伊，就決心投入臺灣獨立運動。伊陸續成立搶救臺灣行動聯盟、新臺灣國策智庫、臺灣制憲基金會佮臺灣新憲聯合陣線一切的付出，攏是為著欲建設臺灣、成做一个佇國際上有地位的正式國家。面對民進黨執政了後對「制憲」的處理態度，伊甚至主動提出欲辭總統府資政，表達伊對臺灣建國的決心

臺獨先輩 辜寬敏：「政府講欲修憲，我要制憲，所以意見無仝，臺灣的共識是欲做一个正常國家，你(民進黨)敢講看無，敢講你毋知」

辜寬敏捌講過，老爸有交代，厝內有錢，是臺灣人暫時寄的，總有一工愛將錢還予臺灣，所以「臺灣需要啥，做會到的我就來做」變做是伊一世人的信念。伊認為，臺灣人就是這塊土地的主人，為著推廣本土文化，伊特別舉辦小說創作比賽，招有志人士、做伙寫臺灣

臺獨先輩 辜寬敏：「咱臺灣歷史小說的主人，毋是啥物偉大的人，每一个人生活佇這塊土地，攏是歷史小說的主人」

人生的舞台已經落幕，辜寬敏認為，上台落台，攏是表演的一部份。表演結束了後，上重要的，是提懸臺灣的「國家意識」