冷氣團到位.拜六暗上冷 臺南以北低溫賰11度
買湘瑩 莊浚佑 /臺北報導
發布時間：
更新時間：
目次
冷空氣一陣接一陣，氣象局表示，這陣冷氣團會影響到拜三。拜五開始，後一陣冷空氣會落南，臺南以北可能會到11度。另外，這禮拜因為東北風共境外汙染物吹來，影響著台灣的空氣品質，專家提醒民眾上好減少戶外運動。另外空氣汙染也可能造成酸雨，基隆已經連紲24年雨水的pH數值攏佇5以下。
東北季風落南，北臺灣天氣烏陰閣不時仔噴雨，真濟人厚衫穿牢牢。氣象局講，這波冷氣團會影響到拜三，拜五開始，後一波冷空氣接紲報到，降溫會閣較明顯。
氣象局預報員 黃恩鴻：「咱愛注意的是拜五以後的降溫，隨著後一波冷空氣落南，除了會落雨以外溫度嘛明顯下降，特別是拜六禮拜，上低溫是拜六暝時到禮拜透早，這段時間臺南以北、宜蘭、花蓮，低溫是11-13度之間。」
另外，根據氣象局的統計，佇迎風面的基隆，連紲24冬雨的pH數值攏佇5以下，予人講做是「上酸的縣市」。預報員解說，這是因為基隆地形的關係，環保署也提醒，這兩工北海岸、南部地區，空氣品質無啥好，愛減少戶外運動
環保署監資處副處長 胡明輝：「昨昏下晡對北部開始，就有部份測站是紅色警示，綴著東北季風增強北部有改善，目前已經到普通抑是柑仔色等級，但是高屏佇風尾風速嘛較弱，所以目前高屏測站猶閣是紅色警示。」
專家表示，這改季風紮來的雨量有限，對減少空氣汙染物的幫助並無大，建議體質敏感的人愛做好防範。
呂尚儒/編輯
專題｜改造地獄路 台灣行人路為何難行？
