國家鐵道博物館臺語導覽 紹介臺灣鐵路文化
買湘瑩 莊浚佑 / 臺北報導
發布時間：
更新時間：
目次
台灣的鐵枝路，對日本時代開始大規模建設，所以有真濟用詞攏是講日語，猶閣濫摻臺語、客語佇咧內底，普通人可能聽咧攏霧嗄嗄。這馬國家鐵道博物館，推出全臺語的導覽，tshua逐家做伙來了解咱鐵路的用詞和文化。(本則新聞標題、導言、內文皆為臺語文)
原來控制火車方向的設備號做「分道」，是對外來語翻過來的，抑若火車頭是叫做車母，後壁勾的車廂就是車囝。導覽人員透過意象、語言的分析，予民眾了解鐵路用詞。
民眾表示：「較早的序大抑是阿公阿媽，定定坐牛車無毋著，in看著烏色拖物件的車親像牛，所以號做烏牛仔，這个名足有臺語氣口」
這是國家鐵道博物館籌備處第一擺舉辦全臺語的導覽，吸引40外个民眾來參加。除了鐵枝路、車廂設備以外，閣將古早鐵路餐廳內底的狀況展現佇逐家面頭前。籌備處表示，in逐個月攏有無仝主題的導覽，希望透過生活化的紹介，予逐家認捌臺灣鐵路文化。
鐵道博物館籌備處主任 鄭銘彰表示：「鐵路工作人員伊用的詞聽起來是台語，毋過可能有一寡是結合客語，嘛有可能是結合一寡日本外來語，變成生活中的一部分，這款鐵路的名詞，會當借這个機會，毋但予民眾知影，嘛會當予工作人員佇紹介的過程中，進一步來學習」
國家鐵道博物館，上緊明年就會開放部分園區，四冬後全面開放，籌備處講，未來預計會提供全面的華臺語導覽服務。
鄭雅存/編輯
