鹿草元宵放火馬 學生共同參與.認捌在地文化
林緯廷/嘉義報導
發布時間：
更新時間：
目次
嘉義鹿草佇元宵有舉辦放火馬的儀式，替地方祈福、消災解厄，今年廟方佮在地的學校合作，頭擺予學生囡仔參與做火馬，希望這項對清代開始的民俗文化，會當佇地方繼續傳承。(這條新聞標題、前言是臺語文。)
專心聽台頂老師的指導，學生囡仔製作火馬，欲佇元宵節做伙參與放火馬。學校佮廟方合作，毋但教功夫，嘛教地方的文化。
參與同學蔡同學講:「第一改做這个小火馬，而且這嘛是我故鄉的一个風俗。」參與同學楊同學講:「學著按怎做火馬，閣會當了解一寡仔地方的歷史。」
廟方講，放火馬對清朝就是鹿草鄉一項消災解厄的儀式，中央捌停辦60冬，前年才復辦。今年佮廟方佮學校做伙製作65隻火馬，擴大舉辦這項活動，嘛予囡仔認捌地方文化。
參與同學林同學講:「放火馬嘛代表共瘟疫tshuā予離開。」參與同學楊同學講:「燒起來誠壯觀。」鹿草圓山宮主委陳日清講:「伊做火馬這个大師，伊來教這个學生囡仔，看講這火馬是按怎來做，因為這个傳統已經強欲消失去。」
鹿草國小表示，放火馬是嘉義縣一項特殊的文化活動，雖然已經中斷誠長的時間，希望會當對這馬開始，透過教育共這項在地文化繼續傳落去。
張曼亭/編輯
2022杭州亞運 台灣百金之路
