國立傳統藝術中心佮文化部辦理「傳統藝術接班人-駐團演訓計畫」，結合民間資源，四年來訓練24个學生，有前場也有後場的。in攏佇今仔日結業，學生共老師奉茶，老師嘛送禮物予學生表示祝福。(此新聞標題、導言、內文皆為臺文)
四冬的工夫做一逝展現佇舞台，毋是科班生的陳彥名，因為一份興趣佮親友的支持，參加國立傳統藝術中心佮文化部辦理的「傳統藝術接班人駐團演訓計畫」，經過五千外點鐘的訓練，佇今年出師結業。
明華園戲劇團習藝生 陳彥名表示：「這四冬來對袂曉到遮的路數，到這馬徛在這个舞台，四冬做四齣戲，我攏做小丑仔，但是人生當中，上有突破的就是這四冬」
習藝生向老師奉茶，老師嘛回送代表傳承的禮物，歌仔戲導師孫翠鳳感念學生用心拍拚
明華園戲劇團計畫導師 孫翠鳳：「葵扇代表文性、法寶代表武性，希望恁以後文武雙全。有藝術真重要，但是品德閣較重要，以後恁愛傳予後一代，按呢才會傳出正確的一條路，有閣較好的藝術文化善循環」
傳藝中心的駐團演訓計畫，結合民間資源，由布袋戲、歌仔戲、客家戲佮京劇前輩擔任導師，將學生tshua7佇身軀邊訓練，為的就是傳承傳統文化
國立傳藝中心主任 陳悅宜：「接班人計畫其實是共傳統藝術的產業鏈搝起來看，對人才的培育、展演，一直到就業，共傳統表演藝術的支持體系建構出來」
傳藝中心表示，戲曲的傳承必須有實務的經驗，未來閣會繼續推動、增加臺灣文化的厚度。
