衛生福利部國民健康署，公佈國人著癌的統計，佇109年計共有12萬1千外人，致著癌症，比108年增加700外人，平均4分19秒，就增加1个癌症病人。其中，大腸癌連續15年是十大癌症的頭一名，第二到第五名分別是肺癌、女性乳癌、肝癌和嘴空癌。
國健署公佈2020年癌症調查結果，有超過12萬人著癌，並前一年增加七百外人，大腸癌猶是15年來發生比率上懸的癌症。若以生理性別來分，男性癌症發生比率上懸的器官，分別是大腸、肺部佮氣管、口腔、肝、攝護腺等等；女性方面分別是奶房、肺部佮氣管、大腸、頷胿腺、子宮等等。
國民健康署署長吳昭軍表示，「大腸癌發生的原因有真濟，紅肉、啉酒，高纖維、礦物質無夠，食食習慣攏會影響。大箍、無運動，攏有相關因素。」
另外根據調查，2020年台灣平均每4分19秒，就有一个人著癌，並前一年來講，是緊一秒，而且逐年攏有加較緊的趨勢。
國民健康署署長吳昭軍表示，「長期趨勢來講，其實伊變緊的速度有沓沓變慢，薰、檳榔、酒。特別是男性，咱頭拄仔有看著，男性佮女性癌症發生，佇口腔癌佮食道癌的比率是差真濟。」
國健署強調，薰、檳榔、酒佮著癌有絕對的關係，呼籲民眾愛培養好的生活習慣。另外，國健署有提供口腔癌、大腸癌、子宮頸癌、奶癌、肺癌五項癌症的篩檢，呼籲符合資格的民眾參與，會使有效降低死亡率。
