南投中寮3.3度.寒人上低溫 北市干焦8.3度
鄭雅文 林郁凱 / 台北報導
發布時間：
更新時間：
目次
受著寒流和輻射冷卻的影響，全台對昨暗到今仔早起攏冷爍爍，誠有耶誕節的氣氛。透早平地上低溫，出現在南投的中寮，干焦3.3度，台北市嘛降到賰8.3度，創下入冬以來上低的氣溫。紲落來明仔載開始，寒流就會減弱，欲變做溼溼冷冷的天氣。
12/25耶誕節這工，路上的民眾包甲密喌喌，因為入冬上強寒流加上輻射冷卻khiok ，日夜溫差大，北部參東北部天氣攏真冷，氣象局講，這種焦冷的天氣只到今仔日，26開始寒流減弱，毋過水氣增加。
中央氣象局預報員 曾昭誠表示：「一直到拜一拜二，攏是一个漸漸回暖的天氣。拜三開始，後一波東北季風會到台灣附近，所以北部的溫度會小可閣降淡薄」
氣象局也指出，因為冷空氣到日時會減弱，溫度小可回升，毋過暗時到26透早，局部曠闊的所在，親像新竹、苗栗倚山區、中南部倚山區等所在，猶是可能出現10度以下的溫度，呼籲民眾欲慶祝也愛注意穿相予燒烙，拜三閣有另外一波東北季風增強，預計影響到元旦。
曾昭誠講：「咱迎風面的基隆北海岸佮中半部，至少雲量攏會較濟，而且會不定時有短暫陣雨發生。所以看著貓霧仔光的機率，會較低淡薄。」
預報員表示，28開始閣有東北季風來到，會影響到迒年暝，北部地區差不多佇15度左右，會有水氣、雲量也會增加，民眾若想欲看新年上早的貓霧仔光，中南部地區較有機會。
