明年開始，環保署規定連鎖超商和速食店，要愛有循環杯借用的服務，店家的循環杯數量愛達到5%，也愛達成15%的年度減量，若無達成目標，閣沒改善，會當逐工處罰。早起環保署公布「借杯子良好服務標頭」，包括7-11、肯德基、麥當勞與摩斯，攏有提著標誌囉。
用手機仔，就會使借循環杯來使用，環保署推動循環杯制度，望減少使用一次性飲料杯，也制定循環杯服務指引、規範衛生等等，22頒贈認證予符合指引的業者。另外對明年開始，連鎖便利商店、速食店愛有5%以上的門市提供循環杯服務。毋過環保署也坦白，目前民眾使用意願猶無懸。
環保署主任秘書 葉俊宏表示：「咱今仔日開始踏出第一步，未來就會使看著伊的成長，使用率的成長，所以一定愛踏出這步」
一塊一塊的循環杯，佇機器內底洗予清氣，民眾使用循環杯服務，真要意的就是衛生問題，而且店頭使用循環杯，欲囥佗位、按怎運送，攏是問題。就有超商代表講，家己建立循環杯系統是開了千外萬。若是未來循環杯欲推捒到中小型業者，毋知in欲按怎負擔。
連鎖超商代表 吳輝振表示：「咱規个過程超過1年，另外就是，咱也開超過千萬以上」
環保署主任秘書 葉俊宏表示：「環保署也咧規畫按怎輔助，抑是補助。這毋管是大型抑是中小型的企業，現此時阮嘛咧想，若是有可能，In對循環杯的清洗敢會使有一寡輔導補助」
另外環保署表示，若有連鎖便利商店、速食店無達到5%以上門市提供循環杯的目標，會逐工開罰；遮的企業一次性飲料杯的減用率，也愛達到15%以上，無達成會限期改善，無改善也會處罰，一擺罰1200~6000。
