日本的創意公司Naked 團隊，最近來到臺灣做一个海洋展，利用光影、色水、聲音佮氣味，打造立體的海洋世界，參逐家做伙認捌生物多樣性。
綴光影、色水、聲音佮氣味的變化，一步一步對海沙埔、近海行入去到6500公尺的海底，這是日本Naked Inc.團隊打造的立體海洋世界，欲予觀眾對浸水式的體驗當中，感受性命的存在
光之影海洋展策展人 村松亮太郎表示：「展覽打造一个真媠的海底世界，佮各種海洋生物的多樣性生態，阮希望透過這个展覽予逐家認捌海洋，嘛對地球環境產生興趣，佇虛擬海洋世界中，感受性命的存在，性命就是這改展覽欲傳達的」
無仝的深度，有多變的物種，除了海底磅空以外，閣有海翁tshua7逐家踅海底，嘛有海洋食物鏈等等八个展區。臺灣科學教育館表示，科技結合藝術的互動展覽，會當將學習變閣較趣味。
臺灣科學教育館長 劉火欽表示：「這類結合科技佮藝術的展覽，攏真受歡迎，八大場景每一區，攏有一个新奇的體驗活動，阮希望達到新奇、趣味、好耍、互動的概念」
Naked Ocean in Taipei光之影海洋展，12月23開始到明年3月初5，佇臺灣科學教育館展出。
