學校結合在地特色文化 推動母語全語境教學
鄭雅文 林郁凱/台北報導
發布時間：
更新時間：
目次
教育部這幾冬推動夏日樂學計畫，佇課程結合本土語言，真濟學校共當地特色結合母語，予囡仔閣教認捌家鄉。
彰化豐崙國小的學生囡仔唱台語歌曲天烏烏，展現學校利用歇假的時辦理本土語言課程的成果，校長表示in這幾冬攏結合在地特色，tshuā囡仔去地方行踏，順紲學母語。
彰化豐崙國小校長 陳永堂表示：「阮邀請阮埤頭鄉，有一寡仔足gâu講台語的老師，來教阮學生講台語，遮的台語就是儘量去揣，參生活有關聯的用語，閣結合舞蹈，教囡仔來跳台語歌的舞蹈。」
除了台語，雲林崙背國小嘛連紲七冬，設計浸水式的課程，予學生囡仔認捌強欲消失的客家傳統文化佮語言，親像用詔安客語學歌謠、用蠟筆畫古厝等等。
雲林崙背國小校長 李秉承表示：「這个詔安是愈來愈少，語言的部分，全台灣會講詔安客語，只賰六七千人爾爾，阮希望這个語言毋通流失。」
教育部國教署表示，為著欲予中小學生利用歇長假的時也通有學本土語文的環境，這幾冬持續鼓勵學校辦樂學活動。希望囡仔用體驗活動來認捌家己的族群語言文化。
專題｜改造地獄路 台灣行人路為何難行？
