新聞頭起先來關心天氣，入冬頭一波寒流報到，今仔日會愈暗愈冷，一直到拜一早起，會是這波寒流上有感覺的時陣。台南以北，溫度上低可能干焦6度到8度；氣象局也針對臺東、澎湖以外，全臺20个縣市發佈低溫特報。根據上新的統計，雙北、桃園地區，對昨昏到今已經有43个人生狂死，無排除是低溫所致。請觀眾朋友一定愛注意室內外溫差、穿予燒。
今年第一波寒流來到台灣，民眾會感覺愈暗愈寒，對17暗時到19早起，是這波寒流影響上明顯的時陣。上低溫的部份，台南以北會可能賰六度到八度，氣象局早時已經發佈低溫特報。
中央氣象局預報員 朱美霖表示：「較明顯的低溫主要是出現咧今仔日(17)的暗時，佮明仔載(18)的暗時這兩个部份，攏分別有一寡較低的氣溫，規个低溫範圍較闊的情形，是出現咧拜一的透早，主要是因為寒流佮輻射冷卻的影響」
雖講17早時因為鋒面通過，氣象局也有針對北部地區，發佈大雨、豪雨特報，其他地區也大部份攏有雨；但是對18早時開始，雨水就會減少。
朱美霖表示：「明仔載(12/18)透早開始，整體雨水會沓沓減少，主要雨水以大台北、東半部遮的較迎風面局部的所在，會有一寡仔短時間的落雨」
氣象局補充，中部3000公尺高山、北台灣2000公尺高山有可能落雪。另外，雖然20、21氣溫就會沓沓回升，但是21暗時，閣有一波強烈大陸冷氣團會來到台灣，到時會有早暗溫差較大的狀況，但是較無雨水。
