孤單踮海角守護討海人 航港局展出燈塔守故事

海邊的燈塔為討海人指引方向,也因為燈塔攏咧較揜貼的所在,燈塔守護人員就愛處理所有大大細細的代誌。交通部航港局這陣將10个燈塔守的故事,翕做紀錄片,而且舉辦展覽,望逐家了解in的故事。

燈塔守黃清榮的查某囝黃蘭麗表示:「會佇彼款真孤單的環境內底,做工課的人,應該in對燈塔有某一種理想,抑是一種熱情。」

燈塔守暝日攏愛注意燈塔的狀況,而且因為燈塔徛的所在攏較偏遠,工作、生活大細事攏愛家己來,規工攏咧無閒,而且定定四界輪調。嘛因為按呢,綴in四界搬徙的厝內人,也定定攏是孤單的。

燈塔守黃清榮的查某囝黃蘭麗表示:「所以我細漢的時,我媽媽有時陣攏規氣共捌人講,我是啞口,因為基本上我是袂講話的。」

燈塔守諸從光表示:「阮彼時佇咧外島,也無啥物歇睏時間,也無啥物工作時間,家己也分袂清楚,暝日顛倒反,24點鐘攏咧做工課。」

交通部航港局這陣共10个燈塔守的故事翕做紀錄片,也舉辦展覽活動,望逐家了解燈塔的故事。

航港局局長葉協隆表示:「以光做厝,按呢的故事,按呢的主題,來翕十齣紀錄片,紀錄燈塔守燈塔家族,非常珍貴的,過去奉獻燈塔的過程。」

燈塔守展覽這馬當咧台北市剝皮寮舉辦,展出到11月底。交通部表示,燈塔守的故事對以早干焦文字,到今有影像紀錄,現此時也透過VR技術等等,望逐家會使以多元角度,了解燈塔的文化佮故事。
 

相關新聞