疫情改網路行善 最近1年85%民眾捌線頂捐款

疫情之下，真濟代誌攏改做佇線頂解決，就連捐錢做善事，嘛會當透過電子產品，用信用卡抑是QRcode來進行。臺灣公益團體自律聯盟公布調查，這兩冬來，民眾漸漸改變捐錢的方式，有超過八成的人會佇線頂捐款做善事。

臺灣公益團體自律聯盟秘書長 沈怡如：「大部份的捐款人，其實八成以上攏會使用線頂捐款的模式，特別是佇這兩冬的比較，阮特別看著手機支付的捐款比例大大增加，對2020年的11.2%，一直增加到今年已經變做是28.7%。」

臺灣公益團體自律聯盟表示，佇線頂捐款的人，有82.7%攏是用信用卡，閣來有28.7%是用手機仔支付工具，上尾是有22.7%的人透過線頂的郵局抑是銀行過數。毋過因為一寡捐款平台的系統無夠密實（ba̍t-tsa̍t），有四分一的公益團體，去予網路詐騙集團利用。自律聯盟建立「好事大平台」，提供民眾正確的捐款資訊，毋通予愛心走入去別人的橐袋仔

臺灣公益團體自律聯盟理事長 鄭信真：「阮提供分類，猶閣有各種無仝的服務資訊，好事大平台阮希望是成做一个臺灣公益組織的資料庫，長期會當查證，嘛會當研究，嘛會當得著閣較濟資訊。」

自律聯盟呼籲民眾，佇網路捐錢毋通衝碰，應該選擇家己熟似的議題、主動了解公益團體的工作報告，若準有憢疑，一定愛參考有公信力的單位所提供的資料。