228紀念館展出李石樵畫作 無聲控訴政治迫害

這幅圖號做田園樂，煞看袂出農家的快樂，台灣本土畫家李石樵以寫實風格畫出真濟社會局勢，親像另外一幅大將軍，畫的人物是蔣介石，透露伊對執政者用戒嚴等等的手段壓迫人民自由的不滿。

二二八紀念基金會專員 陳文恬：「李石樵對咱當時政府的作為，閣有政治上的壓力，其實是足大 也足憤慨，所以伊有畫一寡仔批評政府的畫作，共批評隱藏佇畫作內。」

李石樵過去是台灣文藝聯盟的成員，身軀邊有朋友因為二二八事件受著迫害，伊就將當時袂當講出喙的話用圖共畫出來。最近二二八紀念基金會特別揀出12幅反映出當年國民黨政權來台灣了後，人民生活無平等的困境。像這幅《建設》，就畫出無仝階層、身份的對照，甚至點出二二八事件的導火線取締私菸事件內底，受官員欺負的老百姓。

二二八紀念基金會專員 陳文恬：「所以咱佇畫作當中，會當看著一个賣薰的阿桑，然後攑烏色的涼傘，其實伊也是咧追思，二二八事件的發生佮受難者。」

這改展出的作品，以李石樵對1930至1960年代的創作佮歷史檔案為主，望民眾看著圖內底隱藏的人民心聲，佮228事件的歷史面貌。