人權館音樂坊 招受難者後代唱出白色恐怖故事
林思皓 莊沛文 / 台北報導
發布時間：
更新時間：
國家人權博物館舉辦白色恐怖音樂工作坊，今仔日邀請政治受難者第二代，用音樂佮歌聲，講出佮爸爸媽媽的故事。
作家 施又熙 & 查某囝：「你欲佮阮離開彼一日，也是月欲出來的時。」
佮查某囝做伙唱歌，作家施又熙用音樂佮家己的故事，講出伊身為政治受難者第二代的感想。
作家 施又熙：「伊就共我叫到升旗台頂去，然後就當眾宣佈講，這个人叫施珮君，伊讀幾年幾班，伊就是江洋大盜某某某的查某囝。」
伊無講出來的某某某，就是美麗島事件的施明德。自細漢，施明德的查某囝這个身份，予伊有幾若十年的時間，活佇別人的批評佮家己的憂鬱內底。
另外一个政治受難者第二代曾建元唱的，是in爸爸曾群芳細漢時學的歌。曾群芳佇1950年代捌加入共產黨，予政府通緝逃亡，毋過曾建元一直到讀研究所了後才知影這件代誌。
臺北市高齡政治受難者關懷協會副理事長 曾建元：「我考牢研究所的時陣，我就買一套資本論佇厝裡看，結果阮爸爸到我邊仔，看我咧看啥物遮爾認真，看這啥物物件？發現我咧看資本論，伊就笑一下講，伊就講這本冊，伊幾十年前就看過矣。」
國家人權博物館舉辦音樂工作坊，用歌聲講出政治受難者的故事，佮白色恐怖對臺灣社會造成的影響。
白色恐怖音樂工作坊節目策劃 艾文：「唱歌其實就是一種心情的表達，其實前輩彼陣去予人關的時陣，真濟嘛是咧唱歌，用唱歌來表達心情。」
這个音樂工作坊已經連紲辦四冬，今年12月佇景美人權園區猶閣有一場，予民眾會當用音樂認捌臺灣歷史。
專題｜改造地獄路 台灣行人路為何難行？
