為著欲佇後疫情時代，迎接旅遊人潮的準備，嘉義市頭一个遊客中心，經過一年的施工，佇初10正式啟用。毋但有問路、諮詢的功能，也結合在地產業，佮社區的特產，希望帶動在地的觀光消費。
在地店頭的商品佮社區的特產，攏囥佇架仔頂面予人客揀，這是嘉義市頭一間遊客中心，除了遊旅諮詢的服務，一寡仔社區嘛透過這个遊客中心，推廣IN的土產。
旅行公會全國聯合會理事長蕭博仁表示：「外地人來咱嘉義，人無去佗位行嘛無要緊，咱共tshuā來遮，予IN看一寡仔咱嘉義觀光的介紹，順紲共介紹予外地人知影，有啥物所在通予tshit迌，我感覺這个KANO遊客中心起起來，對咱嘉義幫助誠大。」
嘉義市大溪社區發展協會理事長邵祈誠表示：「會當佇這个遊客中心推廣在地的產業，嘛予閣較濟在地的產業，會當對嘉義市推廣予全國。」
這个58坪的遊客中心，邊仔毋但有棒球場、嘉義公園，嘛是高鐵坐車落車的所在，負責推動大阿里山佮235區域觀光圈的阿管處表示，遊客中心共嘉義縣市觀光資源串聯做伙，對區域觀光的發展有誠大的幫贊。
阿里山國家風景區管理處副處長陳榮欽表示：「透過這个遊客中心，伊會當講是阿里山的入口，來遮得著相關的資訊了後，才對市區去到山頂，到阿里山，到阮別的觀光圈的話，我相信會有一个前導的作用。」
嘉義市政府表示，雖然受著疫情的影響，但是佇國內旅遊有補助，閣有舉辦一寡仔大型活動，舊年嘉義市旅館銷售成績，成長百分之五十以上，未來向望遊客中心的啟用，會當予地方的觀光閣較發展。
