11/26九合一選舉當工，也有一个公投，就是十八歲公民權修憲複決的公投。有民間團體邀請藝人、作家翕影片宣傳，希望逐家來關心18歲公民群這个議題。
民意代表、NGO、學生等等幾若十个人初八佇立法院召開座談會，發表in對十八歲公民權的想法。目前民調指出，四十歲到六十歲這沿的，可能厝裡拄仔好有十幾歲的囡仔，對這个修憲上無支持。
臺灣少年權益與福利促進聯盟副秘書長 林于聖表示：「煩惱in無夠成熟，煩惱in做毋著決定。毋過犯錯是定定有的，我相信逐家攏捌投毋著票、選毋著人過，是按怎無法度予咱的後一代去試、去練習咧」
這改修憲複決愛965萬張同意票才會當通過，欠一張攏袂使得，所以三十萬个確診者敢會當投票，就變甲真重要。
臺灣少年權益與福利促進聯盟副秘書長 林于聖表示：「假使這30萬个確診者無法度出來投票，是毋是應該對選舉人口中扣除？因為修憲案，伊完全是看總選舉人數的一半965萬票，若是這30萬人會算入去，其實影響足大的」
林于聖嘛表示，若是無法度將確診者對選舉人口扣除，中選會就應該愛想盡辦法予遮的人會當出來投票。另外為著催票，臺灣青年民主協會嘛邀請導演吳念真、演員林美秀、歌手阿爆等等翕影片來宣傳。
臺灣青年民主協會理事長 張育萌表示：「網路頂懸的出名人，抑是逐家佇電視頂懸看過的藝人，或者是作家、企業家，逐家做伙來回憶講家己十八歲的時陣，是毋是其實嘛真拍拚，嘛真期待予人肯定。透過這款方式予閣較濟人做伙加入認同的一份子」
四大黨的黨主席攏佇面冊頂懸分享這支影片，表示希望予公投同意票衝破千萬。
