今仔日佇中山堂有臺北文化獎的頒獎典禮，今年著獎的兩个文化人，一个是長期用無仝媒介、推廣文學的詩人陳義芝，另外一个是共國樂佮臺灣本土戲曲，創新結合的臺灣囝婿瞿春泉。
佮臺灣國樂團猶閣有民族歌手合作，陳義芝將伊寫的詩唸出來。伊出過16本詩集佮10外本文學評論，嘛透過無仝媒介推廣文學，今年得著臺北文化獎的肯定。
詩人陳義芝表示：「著獎當然歡喜，毋過努力閣較迫切，我會繼續寫我猶未完成的詩，繼續盡力做我會當做的，文化的代誌。」
另外一个著獎的是臺灣囝婿、音樂家瞿春泉，伊捌佇中國上海佮新加坡發展，23冬前來臺灣，將臺灣傳統戲曲佮國樂創新結合。一年前，伊佮歌仔戲樂師柯銘峰合作，重新用國樂編曲柯銘峰的歌仔戲作品。
歌仔戲演員呂雪鳳表示：「刺桐花開滿山，滿山紅紅真好看。」
國樂家瞿春泉表示：「我彼當陣就共伊融合做，大型國樂團的音樂會，毋但是為唱歌的人伴奏，閣共伊變豐富，有一寡仔唱段，我感覺嘛有真濟國樂發揮的空間。」
瞿春泉表示，歌仔戲的歌攏真好聽，透過這種大眾戲曲，嘛會當將國樂推廣予閣較濟臺灣人認捌。
