4成人毋知18歲公民權公投 NGO佮學生拚宣傳
發布時間：
更新時間：
年底除了地方選舉，閣有18歲公民權、修憲複決，毋過閣有四成的民眾，毋知影這个公投。有一寡仔NGO團體發起宣傳計畫，嘛佮學生佇各地頭的路邊演講，希望予閣較濟人認捌這个議題。
立法院長 游錫堃（2022.3.25）：「中華民國憲法增修條文，增訂第一條之一條文，修正通過。」
今年三月，立法院以109票全數同意通過修憲的提案，將選舉、罷免、創制、複決、公投佮被選舉的年歲，下降到18歲。紲落來愛交予公民複決，超過965萬張同意票才會當通過。雖然有迒黨派立委的支持，毋過根據十月的民調，表示支持的人干焦占53.6%，除非遮的人攏去投票，無欲通過是真困難。
臺灣青年民主協會理事長張育萌表示：「立法院雖然各代議士有迒黨派的支持，但是轉來到民間，其實佮社會溝通就較少，甚至是社會頂懸互相討論度嘛低，尤其閣加上這改的選舉，逐家攏感覺講敢若選情較冷。」
為著提升關注，臺灣青年民主協會邀請各黨參選人捐看板宣傳修憲公投，嘛發起集資計畫來傱廣告的錢，閣連署成立正方辦公室。
下暗來到路邊攑牌仔，遮的學生，想欲透過家己的力量影響社會，用行動證明，少年人嘛是願意擔起參與公共事務的責任。
大學生張同學表示：「無的確有人會講，這馬大部份的高中生、大學生，袂去關心政治，其實我感覺足大部份的原因是，你無予伊這个權利，伊去關心嘛無啥物意義。」
大學生廖同學表示：「今年十一月廿六，十八歲公民權修憲複決，希望各位阿兄阿姐，會使為咱投下同意票，予少年人一个機會，多謝。」
