中國專家探視團團 講病根倚頭殼底.無適合手術
鄭雅文 林郁凱 / 台北報導
發布時間：
更新時間：
貓熊團團因為病況惡化，兩位中國專家初一暗來到臺灣，初二早起也去到臺北市立動物園看團團。目前對團團腦部的病變，各方的共識攏是認為無適合動手術。
透過監視器觀察團團狀況，初二一早起，閣較進入園區探視，兩个中國貓熊專家，吳虹林的專長是貓熊疾病防控和科研繁殖，魏明專長是養飼管理和人工育囝，兩个人的保育資歷攏有20幾冬，經驗豐富。其中魏明捌來過台灣。
台北市立動物園動物組大貓熊館長 陳玉燕：「兩位專家實際看，參想像可能有落差，相對可能較放心淡薄仔，紲落來會想辦法幫助團團。」
台北市立動物園表示，兩位專家因為拄來台灣園方人員有先用𥰔仔予團團過來，觀察速度動作也會針對飼養、醫療等管理數據做交流，目前對團團腦部病變的問題也有共識。
台北市立動物園獸醫室主任 賴燕雪：「伊的病根足接近顱底，無論佇現階段動物的狀態，抑是位置來講，攏無適合手術，這部份阮也參中國專家達成共識。」
動物園表示，短期袂做侵入性的醫療行為，也因為中國專家初七就欲轉去，離開進前也會安排包括台大獸醫系學者專家組成的醫療顧問團見面，這改也是兩冬外以來，頭一遍有中國派動物專家來台灣。
專題｜改造地獄路 台灣行人路為何難行？
