團團恐驚生瘤.請中國專家來看 農委會已核准
買湘瑩 莊沛文／臺北報導
發布時間：
更新時間：
目次
大貓熊團團的腦部病變變嚴重，著惡性腫瘤的機會大大增加。目前，動物園有向農委會申請，欲予中國專家來臺灣探視貓熊的專案已經核准，紲落來就等動物園、移民署佮陸委會，安排中國的專家過來臺灣。國台辦也證實，in當咧辦來臺灣的手續。
大貓熊「團團」的情形無蓋樂觀，獸醫師判斷生出惡性瘤的機率真懸，但是目前已經無適合進行侵入性的手術佮麻醉，所以無法度確定伊腦部病變的程度佮狀況，動物園決定順其自然
台北市立動物園獸醫室主任賴燕雪表示：「目前醫療的處理模式，阮盡量針對舒緩的處理方式，予團團過甲閣較四序，因為阮根本無做任何確診，所以我無法度共你講，伊後手會當有偌久的時間。」
根據農委會上新的消息，進前台北市立動物園申請欲予中國專家過來探視的專案，已經核准通過，這馬就等動物園協調移民署佮陸委會，安排in過來關心團團的病況。
台北市立動物園動物組組長王怡敏表示：「阮佇線頂交流的情形攏真順，醫療部份嘛有初步共識，但是情感面的探視，一定是要實體進行，所以阮予對方來探視，我認為是真適合的安排。」
針對這回兩岸的動物醫療交流，動物園講，會申請予2个中國專家來臺灣一禮拜，園區嘛設立留言區，予民眾寫寡祝福的話，為團團加油。
2022杭州亞運 台灣百金之路
