嘉義水道頭文創園區新展覽 說朴子三代文史
林緯廷/嘉義報導
發布時間：
更新時間：
目次
嘉義朴子的水道頭對日本昭和時代到今，已經有80外年的歷史，嘛是縣定古蹟。有在地青年共水道頭變做故事的主角，用1960、1980佮2千年三个年代的紀錄做展覽主題，展現朴子無仝年代的面貌。
守佇小小的電動間仔看人拍電動，這是一寡仔人細漢時的記持。嘉義縣朴子水道頭文創園區當咧舉辦特展，欲予人透過三个年代，認捌朴子的過去。
策展人潘瑋茵表示:「對阮2000年代算倒轉去1980 1960爸爸媽媽的年代、阿公阿媽的年代，然後共這三个年代 三个產業建構出這間展間，希望逐家展覽看煞了後會當對彼當陣的朴子有較濟印象，或者是閣較濟的想像。」
這个展覽內底，除了呈現三个無仝年代，嘛記錄彼當陣的娛樂、醫療佮服飾產業，規畫這次展覽的團隊表示，in細漢的時攏是遮的人，想欲透過這个展覽，共遮的記持繼續保存落去。
朴子市民陳女士表示:「阮有記持，然後像廿外歲就完全無記持，若四十幾歲，IN就只有一寡仔記持爾爾。」
策展團隊表示，這个展覽會展到明年的二月廿六，希望有想法，想欲轉來故鄉的少年人透過這个展覽知影，水道頭文創園區毋但是一个老厝場，嘛是會當予創意來發揮的所在。
專題｜改造地獄路 台灣行人路為何難行？
