邊境解封服務業欠工 新竹市招大學辦求才會
張君豪 / 新竹報導
發布時間：
更新時間：
前幾年因為疫情的關係，袂少服務業攏減少人力，這馬台灣邊境解封，出現大量人才需求，勞動部新竹就業中心就參幾若間業者，來大學揣人才。
詳細聽業者紹介工課內容，真濟服務業經過3冬外的疫情，人力攏縮減，這馬隨邊境解封，逐家趕緊來到學校揣人手，毋但條件變好，薪水方面嘛有調整，準備好勢欲來搶人才。
百貨業者表示：「較欠的是百貨營業人員，閣有企劃人員佮服務台人員。欠人的部份對阮來講，算真挑戰，嘛算需要去補足的破隙」
徵才廠商也表示：「今年阮有大大調整(薪水)部份，北部地區時薪有185至210，若專職的來講，會使調整到三萬七，儲備幹部攏是四萬以上」
這擺來揣人才的業者包括百貨公司、餐廳業者閣有大型的連鎖服務業，透過現場面試，希望會使趕緊揣著適合的員工。
新竹就業中心主任 胡伯堯指出：「疫情管制開放了後，至少有五千个人額需要補足，嘛真有可能會繼續增加。薪水以新竹地區來講，算點鐘的已經提懸到百七至百九，疫情進前是百六，當然數字是真有可能繼續提懸」
根據新竹就業中心觀察，疫情前後，想欲揣廚房相關工課的人變濟，上主要原因就是薪水較懸，嘛建議業者提懸薪水，對揣人才方面會真有幫助。
