新冠肺炎病尾濟 確診恐驚引骨頭含梢危機

真濟人穢著新冠肺炎了後攏有一寡仔症頭,有醫師就表示,除了腦霧以外嘛愛注意骨頭的健康,有一項國際指引講著,穢著新冠肺炎,嘛可能造成骨質流失。

新冠肺炎的病尾不只嗽、腦霧,有醫師表示有一項針對疫情期間骨質疏鬆的國際指引講著,其實感染新冠病毒了後,也愛注意骨頭的健康。

中華民國骨質疏鬆症學會理事長 黃兆山指出:「新冠肺炎的感染,會造成促炎細胞,會予骨質流失,假使無去檢測骨質的健康,會忽略骨頭的健康,增加骨折風險」

醫師也表示IN佇最近針對百外个臨床醫師做調查,欲了解疫情以來50歲以上民眾的行動力,發見有40%的民眾減少運動、有4%是完全無運動,也發見有增加欲五成的人骨骼接力佮環節機能降低。

中華民國骨質疏鬆症學會理事長 黃兆山表示:「疫情前佮疫情後,真濟病人的行動力,筋肉力有退化。咱的民眾佇後疫情時代,愛做一寡仔正確的運動,假使若會使得,一禮拜愛三工、廿分鐘以上」

醫師表示,曝日頭是上好的方法、也會當加啉寡牛奶製品補充鈣質。另外也會使透過幾个方式來檢測行動力。親像倚壁半跍,看尻脊骿敢通搝予直,抑是人徛予直,看雙手敢通摸著地板等等。

 

相關新聞