新竹美術館展出立體尪仔冊 增加囡仔互動體驗
張君豪/新竹報導
發布時間：
更新時間：
目次
兒童尪仔冊若變做立體，對囡仔來講，讀冊就閣較趣味。美國匹茲堡兒童博物館佮艾瑞卡爾尪仔冊美術館，這陣當佇新竹展覽立體的尪仔冊，咱做伙來看。
透過裝置，面頭前的蝶仔，色水不斷變化。閣有利用投影的方式，予囡仔會使參繪本內底的場景互動，幾若款的藝術裝置，來到現場體驗的囝仔，攏耍甲真歡喜。
家長表示：「予囡仔接觸無仝款的色彩，來遮體驗會使看著囡仔攏真歡喜。」
另一位家長則說：「學著刺毛蟲進化的過程，感覺真有意義。」
美國匹茲堡兒童博物館佮艾瑞．卡爾尪仔冊美術館，這陣當咧新竹展出這種會當互動體驗的立體繪本。主辦單位表示，現場展出的尪仔圖，對囡仔來講攏袂生份，尤其是看著家己認捌的動物，對冊內底行出來，免按怎紹介，囡仔就會耍出家己的創意。
信誼基金會教育推廣主任 李姿儀表示：「囡仔會使透過遊戲，感受著尪仔冊的情境佮意義，而且閣有真濟五感體驗的遊戲，所以囡仔參加活動以後，會感受著閱讀真有趣味，而且未來會佮冊做朋友。」
透過多元的遊戲過程，開發出家己的創意，是這改展覽上主要的目的，主辦單位嘛希望囡仔佇未來對閱讀更加有興趣。
專題｜改造地獄路 台灣行人路為何難行？
