幫助菜鳥爸爸學飼囝 民間組織提供諮詢交流

一名菜鳥爸爸講:「按怎予囡仔順利會當大漢，我感覺對我來講，就是一件真焦慒的代誌。」

新手爸爸講出煩惱的心聲。臺北市政府委託張老師基金會成立、以關心男性為主的社會組織城男舊事，廿九公布男性生育的調查報告，發現對真濟男性來講，生囡仔付出的代價比報酬較懸，佇壓力之下需要心理支持佮學習。

城男舊事主任涂耀丰表示:「第一个，愈少年 無生育經驗的男性或者是無囡仔的男性，𪜶會感覺按怎，會特別感覺壓力大，著無，然後第二个，經濟無穩定的男性，可能包括無不動產的，或者是家庭年收入較低的男性，𪜶會特別壓力足大。」

親職專家魏瑋志指出，猶未生囝的男性可能會對別位聽著晟養囡仔有偌困難，共彼款煩惱變做家己的責任，所以壓力閣較大。

親職專家 魏瑋志表示:「彼个責任是啥物，做好一个爸爸的責任，做好一个翁婿的責任，我無法度予我的家庭閣較濟的資源，我無法度予我的囡仔閣較好的生活環境。」

根據調查結果，城男舊事嘛發表in明年的三个新計畫，毋但會舉辦工作坊予欲結婚生囝的男性佮已經有身的翁仔某，學習按怎照顧囡仔佮面對衝突，嘛會鼓勵爸爸組成支持性團體，互相交流學習。