內政部統計，提著臺灣身份證的新住民人口已經超過65萬人，其中來自越南的新住民占1/5。為著欲予民眾會當了解越南的歷史文化，嘉義故宮南院的2022故宮亞洲藝術節，就以「越南」做主題，用文化體驗、越南影展佮藝文展演等等的內容，相連紲辦一個月的活動。
台頂演奏越南傳統樂器，嘉義故宮南院2022年的亞洲藝術節起鼓，這改以越南做主題，毋但有越南的歷史文物，閣有文化體驗、藝術表演，望民眾加認捌越南這个國家。
國立故宮院長吳密察講:「故宮佇東南亞國家的收藏內底，上有特色，數量上濟，而且品質嘛上好的，應該是越南的文物，阮這改攏共提出來展覽。」
駐台北越南經濟文化辦事處代表武進勇也講:「展出越南各方面的文化，包括文物、藝術表演、電影放送、專題講座、書畫展示等等，攏誠齊全。」
連紲一個月的文化藝術活動，故宮南院表示，只要是越南的新住民家庭、外籍移工佮佇台灣的越南學生，佇藝術節期間，憑證件就會當免費入來看展覽。
越籍導覽志工邱琴秋佮參觀的民眾楊佳芯講:「非常有意義，真難得阮佇台灣會當看著家己國家的文物，阮攏穿家己國家的衫，攏感覺親像佇越南仝款，遮的風景真媠。」
故宮南院指出，今年是臺灣佮越南互設經濟文化辦事處的第30冬，臺灣的產業移工內底，嘛是越南人上濟，希望透過這个藝術節，毋但予臺灣人認捌越南的文化，嘛予台灣的新住民朋友，會當有機會行入來故宮南院參觀。
