1國中煏不當管教穿插 教育處調查傷慢被糾正

雲林私立「淵明國中」長久以來傳出學校違法對學生的穿插對頭管到尾,閣有體罰的狀況,國教署調查發現,確實有違反服裝規定和不當管教,監察院認為,雲林縣教育處咧調查的過程真正傷慢,依法提出糾正。

雲林縣的淵明國中,一直傳出學校違法對學生的穿插對頭管到跤,包括頭毛、衫、襪仔、甚至查某學生內衫穿啥物色也咧管。監察院23開記者會,認為雲林縣教育處佇調查過程真怠慢,提出糾正。
監察委員 葉大華表示:「大部份地方政府(對陳情),大概的作法攏是直接用公文要求學校說明爾,公文發來發去嘛無實際做調查佮了解,陳述人不滿所以一直咧陳述,所以阮才佇調查意見寫講,雲林縣政府一直無清查陳述事項。」
淵明國中閣有體罰的狀況,佇國教署的要求之下,縣政府到淵明國中抽訪60个學生,發現有一半的學生有予體罰過;但是校方調查認為狀況無嚴重、抑無就是講無完全符合體罰的要件,認定教師無問題,雲林縣政府也就相信校方單方面的講法。落尾國教署濟擺要求,學校才共教師記申誡。
監察委員 葉大華表示:「教育部一再退件,一再要求雲林縣教育處掰予清,開煞五擺調查會議了後,六个老師當中有四个明確違反相關規定。」
雲縣府教育處處長 邱孝文表示:「虛心的檢討佮接受,阮會針對整個未來處理類似的事件上,我想應該有較具體而且要較明確,有較好的處理方式。」
教育處表示,會繼續改進。另外監察院也希望教育部,會使加強監督各地方政府的教育主管機關。
 

全台敬老金大調查

相關新聞