嘉義招鄉親做瓷仔枋 用藝術傳承糖廠歷史記持

西元1910年設廠的嘉義南靖糖廠,是嘉義縣過去製糖產業歷史的代表。嘉義縣文化基金會這陣邀請老師,佇社區教囡仔佮序大創作瓷仔板,共在地的文化用藝術創作的方式留佇社區。

社區的序大,專注佇瓷仔土板頂面創造,有的人畫火車,嘛有序大畫枝仔冰,各種內容攏是欲來表達對南靖的印象佮感情。
水上鄉南靖社區總幹事 賴俊嘉表示:「用南靖車站的車牌做主題,然後就是往北就是水上,往南就是去後壁,就是共伊車站車牌復刻佇瓷仔板頂面。」
社區序大 周女士表示:「是無啥物困難,就是老人目睭較無好,做較袂媠啦!」
社區序大 張女士表示:「咱糖廠咧做的桂花香檳,有冰淇淋嘛有紅豆。」
1910年設廠的南靖糖廠,邊仔有社區佮國小,過去攏佮糖廠有誠密切的關係,為著欲予這个記持會當用藝術來展示,嘉義縣文化基金會就邀請創作瓷仔的藝術家,來教社區的序大佮囡仔。
水上鄉南靖國小校長 曾俊銘表示:「瓷仔土的接觸,對捏塑創作閣有刻畫到完成作品,這个過程是學生囡仔毋捌有的經驗。」
陶藝老師 李俊蘭表示:「生活記錄猶閣生活接觸的物件,共遮的題材做成瓷仔板,最後會當呈現佇社區一个所在,一个代表遮的公共藝術陳列。」
南靖國小指出,學校佇瓷仔創作這个部分,其實較無資源,希望透過這改的課程,會當予序大佮學生有閣較濟想法,替糖廠佮社區增加新的藝術氣氛。

 

全台敬老金大調查

相關新聞