家長指板橋1做月內中心虐待 用水道頭沖嬰仔頭

新北市一个媽媽,四月蹛佇新北市板橋一間做月內中心,有一日透過監視器,看著伊的查某囝溢奶,這个照護員竟然共囡仔掠去水槽仔,共囡仔沖清氣,媽媽看著真毋甘,而且這款照顧的方法,也無符合國民健康署的建議,所以要求護理之家應該檢討改善。

監視器畫面看著照護人員抱囡仔佇水道頭遮,家長講伊發見查某囝溢奶的時,護理人員竟然是用水道頭直接共沖。
家長 吳沂錚表示:「護理人員伊的行為予阮真驚慌,因為伊的動作親像咧洗西瓜,若肺管進水是足危險的,而且水溫無法度控制的時也足危險。」
家長出面控訴,講若照國民健康署的正確步數,囡仔溢奶應該愛用紗布沓沓仔拭。看著囡仔的頷頸山佮身軀予按呢沖,真煩惱會受傷,也要求產後護理中心改善流程,承認疏忽。
衛福部照護司科長 曾淑芬表示:「假使衛生局經過查察確實是按呢,伊會使報予阮衛福部來做廢止評鑑合格的處分。」
產後護理之家媒體公關人員表示:「其實阮並毋是囥佇水道頭下跤的問題,媽媽可能對外面看的角度,伊掠準角度是相仝,其實伊是關心,咧看的時陣角度的誤差、誤會。」
護理之家澄清,攏合法合規,是畫面的誤會。毋過家長認為業者需要改善,也望政府愛設一个平台,通公開全國相關業者的違失、開罰紀錄,予做爸母的會當選擇。





 

全台敬老金大調查

相關新聞