竹北厝價1坪喝到60萬 煞有所在到今無水道水

新竹縣竹北市厝價直直起,上懸來到60萬一坪,毋過竟然閣有人家厝二十外冬以來無水道水,嘛無牽管的天然瓦斯通好用,居民希望政府鬥相共解決問題。

水道頭捘開流出來的是地下水,想欲來燃(hiânn)滾水,就連天然瓦斯嘛無,新竹縣竹北市厝價直直起,想袂到佇福興路巷仔內,當地居民二十外冬以來,無自來水、嘛無通牽天然氣的管路。

當地居民表示:「這爿是上早開發的所在,後來厝邊隔壁的路攏開好矣,就干焦阮一條路,按怎申請就是無法度通過,阮攏用規桶的瓦斯參抽地下水,水真垃圾,阮攏去買水來啉」

原來是欲通巷仔兩爿的道路,攏是私人土地,公家單位嘛無法度施工,就連道路想欲鋪打馬膠攏有困難。

竹北市公所主任秘書 郭漢章指出:「福興路計畫道路是8米,目前公所的用地是4米,若是閣做邊溝,道路干焦賰2米,阮會繼續參地主打合」

無自來水、無天然瓦斯,遮爾無方便的日子到底當時會當改善,民眾希望政府趕緊鬥相共解決。

全台敬老金大調查

相關新聞