嘉義打造綠能醫療專車 助偏鄉序大方便看醫生
林緯廷/嘉義報導
發布時間：
更新時間：
目次
嘉義縣人口老化，毋過公共交通佮醫療資源，煞是無講逐位攏真平均，為著解決這个問題，縣政府揣長庚病院佮汽車公司來合作，打造兩台全國唯一使用綠能的醫療專車，希望提供序大佮偏遠地區的民眾較好的醫療照護。
番路鄉衛生所放射師 徐國禎表示：「全身掃描六分鐘，佇台灣來講誠快矣。」
放射師介紹這台檢查骨質密度的設備，是市面頂上先進的設備，檢查一个部位四十秒，規身軀六分鐘。序大檢查了後，資料閣會當透過網路傳去病院，隨提供予醫生判斷。另外一台女性檢查專車，嘛使用上新的數位翕相，提懸檢查的準確性。
嘉義縣衛生局長 趙紋華表示：「有上先進的電光骨質密度儀器的檢測，甚至閣有數位翕相，佮心房纖維顫動的AI智慧檢測，閣有智慧眼底鏡檢查等等。」
嘉義縣政府配合長庚病院佮台塑共同開發的綠能醫療專車，毋但使用環保標準的客車底盤來打造，閣使用鋰電池，取代柴油發電。
嘉義縣長 翁章梁表示：「包括車的能源攏是用鋰電池，包括誠濟的淨零排碳，節能減碳攏有考慮著，閣有智慧科技佮整個醫療系統的結合，阮攏有來完成。」
嘉義縣因為公共交通無利便，造成醫療資源重敧爿，三十這工嘉義縣正式啟用這兩台新開發的行動醫療專車，希望會當提升偏鄉的醫療服務。
專題｜改造地獄路 台灣行人路為何難行？
