疫情中銷量減 嘉義市府鬥銷庇護工場中秋禮盒
林緯廷 / 嘉義報導
發布時間：
更新時間：
目次
嘉義市的庇護工場、早療中心等等的弱勢團體，舊年中秋禮盒因為疫情的影響，整體銷售的成績無蓋好，市政府為著欲共in鬥相共推廣，今年做伙舉辦促銷活動，希望身心障礙朋友的努力會當得著社會支持。
啟智發展中心的學員，佇舞台頂表演，紹介IN做的中秋禮盒，嘉義市的身心障礙弱勢團體，8/18這工做伙佇市政府辦活動，希望增加中秋禮盒的銷量。
嘉義市晨光智能發展中心主任 姚淑芬表示：「聯合行銷的活動，幫阮共遮的身障學員，做工課的一寡仔成果會當行銷出去，然後予阮的學員會當有收入」
嘉義市社會處副處長 溫秋蘭講：「希望今仔日會當透過活動，會當吸引著逐家用愛傳愛，然後會當逐家做伙來鬥相伨」
嘉義市社會局表示，舊年因為疫情的關係，誠濟弱勢團體的中秋禮盒攏賣了無好，今年原物料閣起價，所以希望舉辦這个活動，希望有企業猶是團體來支持。
再耕園咖啡庇護工場 李小姐指出：「因為舊年搪著疫情，無法度像按呢辦一个向逐家來紹介的記者會，所以其實佇舊年禮盒訂講這方面，確實佮過去有減三成到四成」
嘉義市腦性麻痺協會 余小姐表示：「原物料的成本一直起，提懸，閣加上疫情的關係，所以阮對舊年開始到今，阮禮盒的業績一直攏減少」
活動辦落去，一寡仔團體佮企業注文的數量已經超過3千盒，嘉義市政府嘛表示，嘉義市這陣仔嘛有購物節消費抽獎的活動，希望社會大眾會當用行動支持身障朋友努力學習的成果。
