流浪動物零刣殺 數量逐年增加.濟動物等領養

臺南市動保處收容組長 黃瓊如表示：「你一直走出來欲按怎？所以阮的狗攏訓練甲足親近人的，足司奶。」
今仔來到台南動物之家，內底的狗仔就開始大聲吠，怹原底攏是流浪狗，佇遮等待領養的機會。
臺南市動保處收容組長 黃瓊如表示：「現有的收容數目差不多千外隻，其實阮上適合收的量干焦七百外隻，所以阮已經超收兩三百隻去矣，這馬逐家攏蹛都市，像頭拄仔有一个民眾ﰀ兜就是蹛公寓，伊想欲領的狗仔就無希望傷大隻。」
根據行政院農業委員會統計，台灣自2017年零刣殺政策上路以來，全台灣的流浪狗數量，逐年差不多以一萬隻的速度咧增加，到2020年已經有15萬隻，全國公家的動物之家收容壓力嘛真大。嘛因為流浪狗的數量實在傷濟，為著欲管制，政府佮民間的合作也真重要。
臺南市貓狗流浪終點協會理事長 劉芳君表示：「因為伊閹了，伊第一个來講，伊的個性就較溫和，較袂佇外口欲搶地盤、相拍，這个是第一，然後第二就是伊閹起來，伊就袂閣繼續生。」
雖然閹是這馬上積極的做法，但是定攏是閹的速度比袂過生的速度，上要緊的猶是鼓勵逐家領養，對怹負責到老、毋通烏白放捒才是尊重性命的根本。