新竹就業中心設攝影棚 幫贊公司開直播揣人才

一般想欲揣頭路攏愛去到公司參加面試,新竹就業中心這馬成立一个攝影棚,提供想欲揣人才的公司,佇網路開直播的節目,共公司紹介予、當咧揣頭路的人。

專業的主持人加上公司代表,頂真解說公司所需要的人才,透過網路放送予當咧揣頭路的民眾,佇厝內免出門,嘛會使了解工課內容。

民眾表示:「會使毋免參主管面對面,嘛會使真緊提出家己的問題」、「佇疫情期間嘛會使減少疫情,予阮佇防疫方面閣較安全」

新竹就業中心相準現代人定定用網路的習慣,拍造這个專業攝影棚,內底人員嘛經過訓練,做出來的節目看起來蓋專業,除了佇疫情期間會當降低人佮人接觸,對揣頭路的人來講嘛免遐爾緊張。

新竹就業中心主任 胡伯堯指出:「逐禮拜三會揣廠商,來紹介公司的產業參職缺佮勞動條件,甚至是工課內容所需要的技術,佇線頂參少年朋友互動,介紹公司的職缺」

就業中心表示,未來會邀請企業,逐禮拜透過網路,佇線頂紹介公司參人才需求,希望咧揣頭路的民眾,對有興趣的公司更加了解,早一日揣著適合家己的頭路。

全台敬老金大調查

相關新聞