樂生園區計畫望保留歷史現場 今煞煏工程破害文物

新北市新莊的樂生療養院,行政院有核定「樂生園區整體發展計畫」,欲保存樂生的文化歷史價值。毋過樂生自救會今仔日到衛福部抗議,講樂生療養院無遵照計畫咧施工,要求薛瑞元部長愛出面解決爭議。

樂生自救會前會長 藍彩雲表示:「八九十矣,不得已的,無來袂使。」
講著樂生的居民食到老老,閣愛為著保存家己蹛規半生的樂生院四界走傱,藍阿姨就嚨喉滇。樂生自救會初九早時,到衛福部門口抗議,講樂生院方佮包商違反行政院的「樂生園區整體發展計畫」,破壞重要集會場所「蓬萊舍」的文物。
樂生自救會會長 李添培表示:「物件嘛是攏囥咧內底,ﰀ攏無管,就是叫貨車,準做糞埽攏載載去。」
青年樂生聯盟成員 謝宗翰表示:「蓬萊舍是樂生面對國際的窗仔口,伊嘛是樂生的博物館,十幾年來的布條旗仔,真濟重要的協調會,攏是佇蓬萊舍發生。」
自救會指出,按照「樂生園區整體發展計畫」,蓬萊舍會以公共空間的方向規畫做「樂生保存運動紀念館」;毋過院方目前的工程,煞欲共蓬萊舍規畫做三間套房。ﰀ呼籲衛福部應該出面解決樂生的爭議。
樂生自救會會長 李添培表示:「蓬萊舍若無去,阮活佇樂生院閣有啥物意思。」
衛福部附屬醫療及社會福利機構管理會副執行長 林三齊表示:「已經指示樂生療養院按照原本的上位計畫來做,原本的設計就是公共活動空間,(文物)佇修繕以後就會回復,但是目前愛配合修繕工程。」
佇抗議現場,原底衛福部有派出醫福會的科長出面接受陳情,毋過自救會指出,過去是佮執行長、部長等等層級對話,不滿衛福部佇現場派出的官員代表性無夠,拒絕共陳情資料交予科長。衛福部表示,會繼續關注樂生院方佮居民的溝通狀況。
 

全台敬老金大調查

相關新聞