民眾毋知有新倒斡等待區 警方1個月開百外張罰單

警察看著騎oo-tóo-bái違規倒斡的民眾，連鞭閘車，阿伯煞無停。
警察喝：「哈囉！停邊仔、停邊仔！哈囉！停邊仔」
阿伯當場無停車，事後就收著這張一萬空六百箍的罰單，伊誠不滿，講根本就毋知影家己違規，因為這个復興路佮台糖路路口，才新畫機車待轉區，一個月至少已經開出百外張罰單，現場猶是看著真濟騎oo-tóo-bái的民眾，無騎到待轉區，就直接倒斡過，有民眾嘛講家己捌予警察開單過。
機車族表示：「我前幾工為著買卵餅，開六百外箍買一个卵餅，你這馬設一个彼，警察就會當光明正大，講歹聽就是搶錢啦！
附近民眾表示：「真冤啊！因為毋知影有設立這種待轉」
附近民眾表示：「無慣勢啊！庄跤人按怎會慣勢待轉，無定定有人予閘落來」
民眾怨警察新畫待轉區，毋過交通隊表示，會要求騎oo-tóo-bái的民眾兩段倒斡，是因為這條台27線也就是復興路，是屏東市往萬丹、東港主要的路，舊年這个路口就發生過四十件車禍。
屏東縣交通隊勤務組分隊長 鍾志杰表示：「有七成攏是機車轉斡不當造成，本局佮道路主管機關屏東市公所，佇現場會勘了後，佇該路口設置兩段式倒斡標誌佮標線。」
交通隊強調，怹攏是依法開單，若是民眾不服，會當向監理站申訴。