賴香伶指竹科無處理侵權爭議 籲監察院介入調查

民眾黨桃園市長參選人-賴香伶,今仔日佇監察院的門口召開記者會,認為竹科管理處無積極處理林智堅的論文,閣有侵害竹科的權益,希望監察院介入調查。

民眾黨桃園市長參選人賴香伶,今仔日佇監察院門口召開記者會,認為竹科管理局到今猶未針對民進黨桃園市長參選人林智堅的論文侵權提出法律行動,是公務人員無負責任,傷過消極,希望監察院介入調查。

民眾黨桃園市長參選人 賴香伶指出:「佇契約期間,包括簽約、保密條款、驗收過程等等,敢有圖利他人,致使國家財產佮資源被占用,甚至著作權受侵占的問題,所以我今仔日到監察院送檢舉批」

賴香伶認為,佇中華大學教授賀力行的聲明內底會使看著,林智堅使用政府研究案的資料,干焦合情合理,並無合法。

民眾黨桃園市長參選人 賴香伶表示:「賀教授埋一个伏筆,伊講按呢的做法,大家認為合情合理,伊毋敢講合法,為啥物?因為伊已經違反in招標約定的第八條第五項,這是有損害賠償的問題」

合約內底有寫,若無經過竹科管理局的同意,中華大學是袂當將資料予其他的人知影。賴香伶希望政府機關愛徛出來維護國家利益。監察院表示,已經收著陳情批,紲落來會照程序申辦。

全台敬老金大調查

相關新聞