活動中心完工 嘉義鹿草.西井ﰓ長輩做剪黏妝娗
林緯廷 / 嘉義報導
發布時間：
更新時間：
目次
為著欲慶祝社區活動中心完工，嘉義鹿草佮西井社區的序大，做伙佇鹿仔草文化學堂親手創作剪粘，共一塊一塊的磁仔磚貼佇畫好的草圖頂面，妝娗社區新的活動中心。
提剪仔鉸磁仔磚，序大一塊一塊用糊仔共磁仔磚粘起來，嘉義縣鹿草鄉鹿草社區佮西井社區的序大，做伙用磁仔磚創作在地藝術作品。
嘉義縣鹿草社區發展協會總幹事 鄧文榮講：「那做那學，當然無接觸的時陣，會感覺是非常困難，但是佇咱老師的指導之下，咱會感覺那學那做起來是變簡單，有成就感」
嘉義縣文化基金會執行長 陳尚雍表示：「咱希望用遮的物件，透過這个文化藝術的活動，共在地特色顯現出來，予閣較濟人來到鹿草的時陣會當看著地方的特色」
序大共鹿草鄉在地的特色畫出來，閣配合磁仔磚的剪粘創作，老師表示，佇剪粘過程當中，色水的配合閣有按怎來鉸磁仔磚，攏是鋩角。
馬賽克剪粘老師 王雅君指出：「大部份攏是剪粘的部份較困難，畫圖、筆畫畫咧，問題剪粘的時陣，咱咧做彼是有專門的，專門無仝款的技術，所以對序大IN來講有淡薄仔困難，阮會佇邊仔來指導」
嘉義縣文化基金會表示，佇鹿仔草文化學堂附近，鹿草佮西井兩個社區做伙使用的活動中心就欲起好矣，透過這改的藝術下鄉的活動，毋但序大會當學著新的工藝，嘛順紲妝娗社區的公共空間。
專題｜改造地獄路 台灣行人路為何難行？
