1成新冠患者捷失神 需要6-9個月食藥醫治

全臺灣染著新冠肺炎超過430萬人,台灣神經學學會表示,平均五个確診者,就有一个有病尾。醫師統計,有一成的患者有復原了後,有失神、無法度專心的現象。

雙跤攏有車禍受傷留落來的烏青。蘇小姐兩個月進前確診新冠肺炎,落尾出現腦霧的症頭,因為按呢,騎車無法度專心,挵著大卡車出車禍。
落尾蘇小姐看醫生,知影家己有腦霧這个新冠病尾,雖然這馬已經改善真濟,猶是三不五時會發生。醫師表示,腦霧症頭的治療期可能需要6個月至9個月。

北醫精神科醫師 蔡睿蘋表示:「病人可能會來講伊的理解能力,猶有專注力,甚至工作效率變䆀,這時陣咱閣連結伊有新冠確診過,若是佇一個月後,甚至超過三個月的時間,阮就會講你可能就是長新冠造成的腦霧」

神經學學會22開記者會說明in治療腦霧的經驗佮方法。醫師表示,腦霧症頭有時會予病患誤會是食藥仔了後的副作用、嘛可能誤會是確診了後心情無好就失覺察。醫師統計,大概有一成的確診康復者有疑似腦霧的狀況。目前會使透過藥物配合日常食食來改善。

北醫精神科醫師 蔡睿蘋表示:「一寡仔抗氧化劑,最近真濟研究證實褪黑激素,有一寡仔抗神經發炎的效果,抑是Q10等等,這攏有一寡仔臨床幫助的價值」

醫師分析,治療腦霧佮治療失智症有真濟相siâng的所在,包括培養運動習慣、充足睏眠、參與社交活動等等,對治療腦霧攏有幫助。醫師嘛講,未來治療腦霧的方法會綴新冠確診人數慢慢增加。

全台敬老金大調查

相關新聞