水底攝影師吳永森辦特展 促"海洋保護法"立法
林思皓 謝季潾 / 臺北報導
發布時間：
更新時間：
目次
世界出名的水底攝影師-吳永森，佮綠色和平合作舉辦攝影展，希望透過相片予大家看著大海的美麗，佮人類的迫害，嘛呼籲大家做伙關心海洋保護的議題。
一尾色水真媠的鸚哥魚，詳細共看，會看著伊身軀予塑膠索仔纏牢咧。這是水下攝影師吳永森的作品，透過鏡頭予大家看著大海的美麗佮人類的迫害。
水底攝影師 吳永森表示：「我的專業就是攝影，我利用攝影予大家知影，大海當咧發生啥物代誌，猶閣有大海遮爾媠，你敢欲保護伊」
吳永森已經藏水沬十冬矣，到今伊的水底攝影作品已經得著超過170座國際獎項的肯定。毋過講著一開始做這項代誌，吳永森表示，這是一个美麗的意外。
水底攝影師 吳永森講：「因為藏水沬一逝出門就一兩個月，阮某就懷疑講，我佇外口是毋是有一寡仔奇怪的代誌，我為著欲證明我真正是咧做這項代誌，我才買人生頭一臺相機，開始人生頭一擺翕相」
吳永森這改佮綠色和平合作，透過展覽來予台灣社會做伙關心海洋保護的議題。
綠色和平海洋專案主任 鍾孟勳表示：「透過這个攝影展，會使予閣較濟民眾，只要來到攝影展的現場，就會使看著水底豐富的生態」
吳永森嘛特別委託綠色和平送一幅相片予行政院，希望行政院趕緊通過《海洋保護法》的草案。伊希望有一工，伊會使真驕傲共外國朋友講，逐家會使來臺灣藏水沫，因為臺灣的海洋真清氣、真媠。
