7月已367人熱甲送醫 拜六高溫恐驚衝到38度

既然有寒流,天氣傷熱、燒空氣就有可能出現熱流。根據衛福部統計,2021年七月因為熱傷害、著痧去看醫生的,有423人次,今年七月統計到今已經有367人次。氣象局預估這拜六、禮拜,受太平洋高壓影響,有可能出現今年上懸溫,類似國外熱流的極端高溫,來到37度、38度。提醒一定愛補充水份,有糖尿病的人,莫食糖份傷懸的水果,避免身體欠水。

天氣燒唿唿、受太平洋高壓影響,20、21兩工,各地高溫來到32至35度,大台北、宜蘭、台東地區佮花蓮縱谷,有機會超過36度,氣象局表示拜六大暑和禮拜日會是上熱的兩工,有可能出現今年的上懸溫。

氣象預報員 劉沛滕表示,「未來一禮拜高溫對紅色線會當看著,基本上攏佇35度以上,特別是拜五、拜六、禮拜日這三工,有可能來到37度甚至38度的高溫,愛特別注意這種局部高溫的現象,注意熱傷害。」

氣象局表示21到後禮拜二,台灣有機會出現類似燒湧的極端高溫,愛注意熱傷害,根據衛福部統計,舊年七月份,因為熱傷害看診的計共423人次,今年七月到七月十九的數字已經來到367人次,營養師提醒,血糖較懸或者是糖尿病患者,是著痧、脫水的高風險族群,愛特別細膩。

內湖國泰診所營養師 張斯蘭表示,「咱若天氣熱,咱可能就會食足濟水果水份較濟的水果,像西瓜遮的物件。你血糖夯起來,其實對你來講你身軀內面水份的濃度會較懸,其實對身軀嘛是一種傷害。」

醫師表示高血糖會予血管內底欠水,久來身體就會脫水,失去調節體溫的能力,引發各種熱傷害症頭,也提醒年歲較大、有慢性病和長期佇日頭跤做穡的人加補充水份,氣象局表示21開始,各地水氣會愈來愈減,只賰小可仔山區有局部陣雨,高溫愛到拜二才較會略略仔降,各地猶原濟雲燒熱,提醒民眾猶是愛持續注意熱傷害。

九合一選戰解析

相關新聞