陳時中公佈競選團隊 陳建仁擔任總部主委

民進黨臺北市長參選人-陳時中的競選團隊,已經選好競選總部,由前副總統-陳建仁來擔任競選組部的主委。

佮前副總統陳建仁做伙行入城隍廟,民進黨台北市長參選人陳時中選佇大稻埕做陸戰起步,也宣布競選團隊,陳建仁擔任競選總部主委。

前副總統 陳建仁表示:「雖然我較早做過SARS的指揮官,但是伊這馬做指揮官,所以講伊是相當寂寞的人。但是我這馬欲共時中講,你袂閣再孤單,這改選舉我一定徛出來參你做伙,做伙伨你、好毋好」

第一改的宮廟行程,民進黨立委、議員kheh滿滿,起手陣容堅強,陳時中笑講拄起頭猶未熟練,未來會做上強雞母tshuā雞仔。面對陳時中對宣布參選到成立競選總部、團隊一改到位,早起到龍洲里關懷據點的國民黨台北市長參選人蔣萬安,猶是老神在在。

國民黨台北市長 參選人蔣萬安 講:「對手的勢面按怎,閣有IN會有偌濟大跤相伨,其實我對我的團隊攏足有信心,因為阮猶原相信,市民才是真正的主角」

朝野兩大黨選舉跤步起行,台北市副市長黃珊珊雖然猶無選舉行程,但佇面冊回應最近媒體民調若成做三跤㧣,最後可能以棄保決勝負,伊講勤政佮能力會是市民選擇的方向,比賽根本猶未開始。
 

全台敬老金大調查

相關新聞