海上比粉鳥只有1.58%飛轉來 動保嗙傷殘忍

臺灣放粉鳥比賽的活動,長期以來攏受著動物保護團體的批評,是因為粉鳥的主人,會共粉鳥載去外海放,煞有9成以上的粉鳥,因為體力無夠飛袂轉來,就葬身大海。7月真濟人攏會放粉鳥比賽,今仔日動保團體就和立委召開記者會,要求相關機關重視。

佇咧籠仔內的粉鳥「霸姬」,3月的時予人佇路中央發現、當時伊的翼股已經受傷無法度飛。因為有跤環,動物保護團體確認伊是比鳥了後、予人棄養的粉鳥,才共收養照顧。動保團體講,大部份比鳥的粉鳥仔是無遐爾好運。

台灣鳥類救援協會秘書長吳峮毅表示,「遮的粉鳥是少數有法度對海上飛轉來的,但是因為in無利益、無價值矣,所以in予人放捒,有的予煮來食,有的予剪翼了後,擲甲遠遠去。」

動保團體指出,比鳥會駛船共粉鳥載去三百外公里的外海,才放飛予in飛轉來,但是大部份粉鳥攏無法度承受遮爾長時間、無歇睏的飛行。舊年冬季南海比鳥,計共有4萬5千外隻粉鳥予載出海比賽,成功飛轉來的賰七百外隻,干焦1.58葩。

農委會畜牧處寵物管理科長宋念潔表示,「跋筊為目的動物競賽行為是禁止的,類似的案件若無警政抑是檢調In介入調查,干焦靠動保行政單位,破案的機會誠低。」
內政部警政署偵查科長王耀輝講,「會配合動物保護的主管機關,就是農委會遮,若有相關案件需要調查,相關機關會配合。」

無論是以動保法內底傷害動物的法條開罰、抑是針對以動物跋筊的行為開罰,攏需要行為出現了後,農政佮檢警才可能會辦。動保團體指出,希望相關單位會使佇比賽宣傳階段,就開始調查,在場立委陳椒華表示,會閣揣行政院討論、認定主管機關。
 

全台敬老金大調查

相關新聞