國內逐年欲5萬人腦中風 衛教手冊出版教照護

根據統計,腦血管疾病佇臺灣10大死因排第四个,逐年增加3萬至5萬个腦中風患者,而且有少年化的趨勢。台灣腦中風學會佮台灣腦中風病友協會,特別推廣腦中風中長期照護手冊,希望建立民眾預防佮照護的觀念。

民眾,「阮某完全愛綴前綴後,完全無法度自理,規个人生對彩色變烏白。」

今年63歲的江先生,6冬前雄雄腦中風,經過復健醫療才沓沓仔復原,但是中風了後需要長期照護,台灣腦中風學會佮病友協會特別推廣中長期照護衛教手冊。

台灣腦中風病友協會理事長 周中興表示,「對預防到急性期到慢性期,今仔日的重點佇中長期的照護,這个慢性期才是長期的疼。」

像中風半冬後有四成的人會出現跤手挽脈bán-me̍h,手冊有解說現象、治療方式等等。另外醫師也講,近年來中風發生率衝懸,過去六个人有一个可能中風,這馬是四个就有一个,年紀也降低,45歲以下發生率有12%左右,佮生活形態有關係。

台灣腦中風學會常務理事 連立明表示,「有三懸的人伊的危險性是比無三懸的人閣較大,中風會當預防的就是對三懸先開始控制。」

醫師表示,腦血管疾病佇國人十大死因排第四位,逐冬大概增加三至五萬的腦中風患者,若有中風過又閣中風機率也較懸,症狀、死亡率也會提懸,希望透過手冊,予民眾了解預防的觀念。

相關新聞