三方支付詐騙濟 民眾買果子受騙8改.損失19萬

透過第三方支付平台做買賣是誠利便,毋過這馬有詐騙集團偷提別人的信用卡資料,佇第三方支付平台消費,受害者等對方已經鑢卡鑢八擺,總共十九萬,才發見家己去予人騙。

透過無現金支付方式,買賣會使閣較利便,這馬煞傳出有人利用第三方支付工具詐騙。王小姐過去佇線頂買物件,拄著詐騙集團,盜用伊的信用卡號碼去登錄第三方支付服務消費。

受害者 王小姐指出:「詐騙集團就共你的信用卡資料,縛某一个第三方支付的口座,了後這个第三方支付口座就會認為,這个口座是你的,就會使一直鑢卡。第八筆,已經十九萬的時,發卡銀行才通知我、佮我確認我敢有做遮的消費」

王小姐表示,提供信用卡號碼了後,嘛回傳一擺簡訊OTP號碼予對方。伊質疑,為啥物干焦一擺OTP授權,對方就會使佇第三方支付平台消費遮濟遍。立委也指出,OTP簡訊並無寫是欲登錄第三方支付、抑是普通消費使用,要求相關單位改善。

經濟部商業司專委 李勇毅表示:「有佗一寡部份是阮會使共遮的囥入去定型化契約,阮會往這个方向努力」

金管會銀行局專委 曹玉翎講:「阮轉去會協調銀行公會,針對OTP格式這部份,阮會去了解」

除了希望會使佇OTP簡訊加上相關警告資訊,金管會也表示,針對銀行方面佇發OTP簡訊時,敢有法度分辨每封鑢卡的OTP,目的是欲登錄佇第三方支付平台、抑是單純消費,嘛會閣再了解。

九合一選戰解析

相關新聞