頂個月才提全國亞軍 新竹少棒隊今19人確診

新竹縣少棒隊頂個月提著全國亞軍,毋過比賽了後做快篩,球隊24人有19人確診。有人質疑球隊無顧選手健康,叫囡仔去比賽。毋過新竹縣棒球委員會是講,比賽進前攏有照規定,確認健康狀況無問題,選手應該是比賽比了才確診。

選手盡全力共球摃出去,新竹縣少棒代表隊,頂個月到台南參加比賽,提著第二名好成績,毋過比賽了煞傳出球隊24人有19人確診。這陣有風聲,講球隊明明知影這種情形,閣予囡仔出賽。家長聽著這種講法出面澄清。


球員家長表示:「身為家長非常氣憤,毋知影對方是咧想啥物。既然一切攏照大會規定,比賽嘛照常進行,最後發生問題,共紲後的問題解決好勢就好,毋免去傷害著囡仔」

新竹縣棒委會主委 上官秋燕掰會:「鬱拗事實,講教練明明知影囡仔已經穢病,閣強迫去參加比賽,完全毋是事實」

球隊表示,比賽期間確實有一个球員,因為身體無爽快先離開,毋過其他的人一切攏正常,絕對無講確診閣強迫囡仔比賽的代誌。新竹縣棒球委員會嘛要求傳消息的縣議員出面道歉,若無,無排除提告。毋過縣議員拒絕,伊認為自己是接受陳情,監督教育處。

新竹縣議員 余筱菁表示:「民眾向我陳情了解以後,才閣向教育局來確認,我發現教育局並無完全掌握球員的狀況,甚至確診人數in嘛毋是真確定。未來是希望新竹縣教育局,訂出一个標準程序來保障學生的安全」

教育處回應講,比賽進前攏會要求學生落實防疫措施,而且隨時注意身體狀況,無論是比賽前佮比賽了欲轉來的時陣,嘛一定愛做快篩檢測,來確保學生的健康。

全台敬老金大調查

相關新聞