屏東8歲囡仔發燒到41度 煞連紲3間病院毋收

南部疫情當咧滾絞,病院醫療量能真食力,這馬閣傳出屏東有一个8歲的查埔囡仔,確診發燒到41度,暗時家長領伊走3間病院急診,病院攏毋收。就有縣議員質疑,屏東兒科的醫療量能不足,縣長潘孟安表示,病院無應該拒絕,會要求IN檢討。

屏東確診人數增加,病院急診室外口,醫護人員真無閒,這馬煞傳出22屏東有一个八歲查埔囡仔,因為確診發燒到41度,阿母真著急tshuā囡仔去急診,第一間去屏東基督教病院,因為內部有確診者咧清消,無法度收病人,紲落來閣去部立屏東病院,因為急診無兒科,IN趕緊閣去第三間寶建病院,煞因為醫生猶袂接著衛生局聯絡,嘛無收。

屏東縣議員 陳揚:「連紲去三間病院攏無收,高雄長庚的回應講屏東無收高雄收,其實聽起來真艱苦心酸。屏東啥物時陣醫療量能變遐爾絚空、遐爾艱苦?」

雖罔囡仔最後是家己食退燒藥仔,人已經無代誌,屏東縣議員佇議會質詢,認為這馬南部疫情滾絞,屏東尤其是兒科的醫療量能成欠缺。

屏東縣長 潘孟安:「醫療端不應該佇你當咧清消抑是管理系統,逐家攏誠無閒無毋著,要求in一定愛檢討。不管部屏抑是其他兩間私立病院,要求未來袂當閣有類似狀況。」

屏東縣衛生局疾管科長 仇幼娟:「函文二十二間病院,重申假使有危急病人,應該愛依醫療法相關規定,先予in適當的急救抑是採取必要措施,保障民眾就醫權益。」

目前屏東基督教病院是唯一急診有兒科的,縣長潘孟安表示,未來閣會增加恆春基督教病院,希望莫閣出現類似的案件。

全台敬老金大調查

相關新聞