無通參加WHA 咱行動團爭取佮各國代表雙邊會談

美國總統拜登上任了後頭一改訪問日本,和日本首相岸田文雄會談。會議當中講著烏克蘭情勢,岸田文雄除了強調毋承認單方面用武力改變現況,更加希望會當加強美日合作,由美國、日本來主導國際社會動態以外,講著臺海問題,拜登也閣再表態,若準中國拍臺灣,美國願意用軍事介入,保衛臺灣。針對拜登的說法,咱國外交部回應表達誠摯歡迎佮感謝。

第75屆世界衛生大會WHA,5/22佇瑞士召開會議,台灣雖然無受著邀請,毋過咱的政府猶是有組成世衛行動團,爭取和各國進行雙爿會談。包含衛福部次長李麗芬佮立陶宛衛生部,5/23攏咧推特發文,攏講著台灣和立陶宛當咧討論健康合作的議題。台灣和立陶宛,除了討論健康合作的議題,也攏同意雙爿的合作會促進閣較健康、閣較友善的人類社會。另外,世衛秘書處進前公告,已經收著13個友邦提出要求邀請台灣參與大會的補充提案,毋過,根據路透社上新報導,世衛大會已經決定,拒絕台灣申請參與案,無列入去正式議程。大會主席表示,這項決定是根據總務委員會的建議做出的決議,總務委員會禮拜的閉門會議討論過這項提案。中國駐聯合國日內瓦辦事處大使陳旭表示,台灣參與世界衛生大會的政治和法律基礎是無存在的。
 

全台敬老金大調查

相關新聞